وشوش
رمضان بلون الدم
فوانيسنا لون الدم
زيت قنديلنا لون الدم
رمضان بريحة الدم
وطبيخنا ريحة الدم
وبخورنا ريحة الدم
عجيبه يا شعب لما تسلم الدقنه
لكل بياده أو دقنه
ولما نفوق على ضيقنا
نقول .. الله
وبعد مصيبة في مصيبة
يؤوب أيوب إلى مولاه
ويصرخ .. آآآه
ومين قالك بإن الغفلة دي طيبة
ومين قالك بإن الظلم كان هيبة
ومين خربطلك الأوراق
ولبسلك هنا الخيبة
وأعجب منها بعد الفوقه .. رح ننسى ونتسامح
وترجع ريمة لعادتها ويرجعلى الظلوم رابح
!وترجع راية الشبان وكلمتهم خيال جامح
لازمله تلتمية لجام
ومية كرباج .. ومية ورده
تهدى الشعب وتصيب روحه بالهده
وأعجب منه لما اتعجب انهارده على الأحوال
وأسير وما أسير وفي الآخر
أحس وكأنى نملايه في قعر شوال
وأبكى على اللى ما يبكى
ولا عمينشغلّه بال
وطن ساكن معايا سنين
يقاسمنى الشقا والشوق
ويرمينى الزمن ببلاه
فينشلنى ويرفع فوق
يسامرنى .. يحجينى
يونسنى .. يسلينى
ويسردلى حروبه الفايتة حدوتة
ويطعمنى السنين أيام .. هنا وليالى مفتوتة
ويكنس قلبي من غيره
ويفرش في العروق خيره
يشخبط صفحة قليبى بخطوط سيره
وطن هلكاه وشوش عكرة
نفوس تكره نهار بكرة
!!تحب الليل
خفافيش ضلمة ما تحسن في نورنا السير
ولا تعرف تحب الخير .. تحب الغير .. تحب الطير
!لأن الطير ده حريه.. وحريتها في حبس الغير
وشوش كشرة
تشوفها أسود بتحمينا على النشرة
تشوف أنيابها تنهشنا إذا خالفت ما ناشره
وتسمع زعقة الأومباشي وسطى سكون عساكرنا
!!!يا إبن الكلب والحشرة
وشوش عواجيز وبتكرمش
ولا تعرفها خرفانة
ولا تعرفها بتحشش
وأحزابها وأحبابها وأولادها وطلابها
يدوب ميات .. رح تزيدش ولا تقلّش
وشوش على الدش سهرانة
إكمِن جيوبها عمرانة
تولع في بلاد الله
وتشحن في عباد الله
ويوم ما تمسها تصرخ
شعارنا الكدب بأمانة
أبوك إعلام
وأبو الأوهام
وأبو اللى يخلى أرواحنا دى رهن كلام
وأبو الخاينين وأبو الظالمين وأبو النايمين وأبو الأحلام
وشوش شابّة
وشوش طاهرة
وشوش ناضرة
لجنة ربها ناظرة
أمانيها كرامة وعيش وجو أمان
ولقمة وصحة للغلبان
ودينها سليم ما يتهزش
خطاها تسير ما تتهدش
دماها تسيل ما تتلمش
ولا اليأس القديم أبدا
في ليله عليها هيعشش
وشوش طاهرة
تموت الطاهرة في الأول
وتبقي العكرة والكشرة
وتبقي الخاينه للعشرة
مـــــــــــــــا تتمسش